في الجزء الثاني هنتكلم عن إيه اللي ممكن يتعمل في العربيات عشان ننزل مركز الثقل...
دلوقتي بقى ممكن ننزل العربية حسب الحاجة ووقت اللزوم
وممكن نركب جنوط ألومنيوم (سبور)
اللي ما تابعش معانا من الأول يقدر يدخل على ← الجزء الأول
طبعا... الحاجات اللي حقولها دي غالبا بتبقى بردو في تصميم العربية، بس فيه حاجات تانية ممكن تتعمل في ورش متخصصة..
وعلى سبيل المثال:
- تركيب المحرك في وضعية منخفضة، لإن المحرك وعلبة التروس من أكتر الحاجات اللي ليها وزن في العربية...
طب إزاي ننزل وضعيته؟؟؟
هو بصراحة إحنا هنغيره ونجيب موتور إسمه "بوكسر" Boxer.. الموتور ده موجود في عربيات قليلة دلوقتي، بس من أشهر العربيات اللي مركبة الموتور ده:
بورشه سوبارو ألفاروميو (لحد 1997)
وزمـ ـ ـ ـ ـ ـ ـ ـ ـ ـ ـ ـ ـ ـ ــان كان متركب في البيتل
طبعا ... كده عرفنا ليه الماركات دي مشهورة !!
الموتور ده فكرته زي فكرة الموتور على شكل حرف V، بس زاويته 180 درجة، فبقت البساتم بتتحرك زي الملاكم، وده سبب تسميته "بوكسر"...
محرك منبطح (بوكسر) محرك بشكل حرف V محرك رأسي (In-Line)
فالموتور كده ما لوش ارتفاع عالي... بس عايز مساحة عرضية.
زي اللي في الصورة ده:
طيب لو تغيير الموتور مش نافع، نعمل إيه؟؟؟
نحاول ننزل بمستوى العربية بالكامل ونقرب من الأرض
أو نحاول نشيل من الوزن اللي موجود في أعلى السيارة...
مثلا:
العربية تبقى كابروليه..
أو نستغنى عن الزجاج ونركب بلاستيك...
ممكن كمان نغير الكبوت ونركب واحد فايبر.. (فايبر بجد.. مش ستيكر)
وفيه أفكار زي دي كتير... صحيح ماهياش رخيصة أو سهلة .. بس كلها مطبقة في عربيات بنشوفها في الشوارع... سواء جاهزة من المصانع أو معدلة في الورش.
طب ما ينفعش ننزل وزن العربية ككل، مش الأجزاء العلوية بس؟؟؟؟
أكيد...
ممكن نشيل الفرش من العربية وأي حاجة مالهاش لازمة زي ما بنشوف في سباقات الرالي.. طبعا مش هشيل الفرش من عربيتي 😁..
الصورة اللي عاليمين دي لعربية قبل التعديل... واللي عالشمال لنفس العربية بعد التعديل
وممكن نركب جنوط ألومنيوم (سبور)
بس الكلام ده ممكن ما يأثرش على مركز الثقل، بس هيأثر في القوة اللي بتسيطر على العربية...
وده اللي هبدأ كلام عليه في الجزء الثالث
...
