الكلام اللي هقوله ده يمكن يخلى ناس كتيرة تستغرب، بس فعلا العربية الخفيفة أحسن؟؟؟ بس أحسن في إيه؟؟؟
الناس عادة بتقول العربية دي تقيلة، بتقولها بطريقة كإنها مدح، المشكلة إننا لما بنقول التقيلة أحسن مش بنحدد، احنا سمعناها كده وخلاص..
المهم، فيه فرق كبير بين عربية تقيلة وعربية متزنة (أو موزونة على الطريق)...
العربية التقيلة يعني وزنها كبير، إنما العربية الموزونة دي ممكن أوي تبقى عربية خفيفة، بس الرك على التصميم بتاعها.
خليني أوضح أكتر:
العربية التقيلة (اللي وزنها تقيل يعني) بتستهلك بنزين كتير عشان تتحرك، وصعب السيطرة عليها لو عايز تفرمل، فكر كده في الفرق بين عربية صغيرة وأوتوبيس (طبعا الفرق كبير بس ده للتوضيح بس)
بلاش.... لو رحت تشتري حاجة الشهر من كارفور مثلا... أكيد لما بتزق التروللي اللي معاك وهو فاضي مش زي ما وهو مليان.
أهم حاجة في اتزان العربية هو توزيع الوزن، مش كمية الوزن... وكل ما كان الوزن متركز في الأرضية كانت العربية موزونة أكثر..
عشان كده العربيات الاسبور بتبقى واطية وعريضة عشان تثبت على الطريق
وكمان كل ما كان الوزن متوزع بالتساوي بين الأمام والخلف هناخد اتزان أحسن
ولو اتكلمنا على العربيات العادية بتاعتنا، يبقى العربيات 4×4 دي مش ثابتة خالص..
جرب كده تسوق عربيتك مرة وهي فاضية .. ومرة تانية وهي محملة ناس ورا أو حاطط حاجة تقيلة في الشنطة، أكيد لو حتاخد غرزة العربية حتعوم منك، أو على الأقل رد فعلها مش حيبقى زي ما انت متعود.
تصميم السيارة له دور مهم قوي في ثباتها .. وبالذات نسبة ارتفاعها إلى عرضها اللي بيأثر بشكل مباشر على مركز الثقل فيها..
لاحظ الفرق في مركز الثقل.. الموضوع ده مهم جدا
لإن ارتفاع مركز الثقل بيخلي العربية تميل أكتر في الملفات ، وده ممكن يخلي العربية تقلب بسهولة..
المشكلة في ثبات العربيات هي التحكم في الوزن، ومشاكل ثبات العربيات ما بتبانش إلا لما بنغير اتجاهنا، في الملفات أو في الغرز...
أصل طول ما احنا ماشيين في خط مستقيم.. كل العربيات تقريبا معندهاش مشكلة في الثبات.
المعروف إن الكتلة ما بتميلش إنها تغير حالتها..
إيه الكلام الصعب ده؟؟
يعني لو الكتلة واقفة لازم يبقى فيه قوة تحركها، ولو هي متحركة لازم يبقى فيه قوة توقفها، مش بس كده، ده لازم يبقى فيه قوة عشان تغير اتجاهها..
الموضوع ده بنحسه واحنا راكبين العربية...
لما بنفرمل أجسامنا بتحدف لقدام عشان أجسامنا بتبقى عايزة تكمل بنفس السرعة اللي كنا ماشيين بيها...
ولما بندخل ملف أجسامنا بتحدف لبرة الملف.. عشان أجسامنا بتبقى عايزة تكمل في نفس الاتجاه اللي كنا ماشيين فيه.
الكلام ده بيسموه "القصور الذاتي"
طب دي أجسامنا، أمال العربية ما بتعملش كده ليه؟؟
في الحقيقة العربيات (وأي جسم متحرك) زينا بالضبط (دي حقيقة فيزيائية) وده بيبان في درجة ميل العربية عند الفرامل أو في الملفات، ودرجة الميل دي بتزيد بدرجة كبيرة أوي مع زيادة السرعة...
ويا سلام بقى لو الوزن تقيل...صباح الحوادث... (مش عايز أجيب معادلات عشان دمي ما يبقاش تقيل)...
في الملفات بتتولد قوة (بيسموها القوة الطاردة المركزية Centrifugal Force) بتسبب خروج الجسم اللي بيتحرك إلى خارج الملف، والقوة دي معتمدة أساساً على الوزن.. وبتزيد بشكل كبير جدا مع زيادة السرعة.
طب ده إيه علاقته بالكلام اللي اتقال قبل كده؟؟
ارتفاع مركز الثقل عامل مؤثر جدا في موضوع درجة ميل السيارة..
وعشان أوضح أكتر:
جرب تمسك شاكوش من آخر العصاية الخشب بتاعته (بعيد عن الراس الحديد) وحركه يمين وشمال.. وبعدين امسكه تاني بس من عند الراس وحركه يمين وشمال...
في الأول هتحس إن السيطرة عليه صعبة وإيدك لازم تمسكه كويس... وفي المرة التانية حتلاقي الموضوع سهل قوي...
هي دي باختصار المشكلة كلها.. إن المسافة بين مركز الثقل (راس الشاكوش) عن الأرض (إيدك) بتعمل عزم كبير محتاج قوة كبيرة عشان تسيطر على الوزن ده..
ولو وصلت زاوية ميل مركز الثقل لدرجة معينة (بيسموها نقطة الانقلاب) العربية بتقلب علطول...
يبقى دلوقتي قدامنا حل من اتنين:
يا إما نحاول ننزل بمركز الثقل في العربية لتحت..
يا إما نزود القوة اللي بتسيطر على مركز الثقل عشان ما يوصلش لنقطة الانقلاب
تابعني في الأجزاء الجاية...
الجزء الثاني
...
